Soroh-Soroh Kruna

Soroh-Soroh Kruna    (WIDARSA)

Dumun titiang sampun polih ngamosting indik kruna wilangan lan soroh-sorohnyane. Ring Basa Bali wenten makudang-kudang soroh kruna. Minab yen wenten sameton sane madue arsa jagi ngawacen indik kruna wilangan, driki linkne ring artikel Kruna Wilangan. Inggih ne mangkin lanturang titiang malih indik soroh-soroh kruna. Wangun kruna ring Basa Baline wenten petang soroh makadi :

1. Kruna Lingga (kata dasar)
   Wenten lelima pepalihannyane inggih punika :
   
   • Kruna lingga akecap utawi awanda (satu suku kata)
     upami : yeh, don, pis, tas, miwah sane lianan.
   • Kruna lingga kalih kecap utawi kalih wanda (dua suku kata)
     Upami : durus, padem, putih, suci, msl.
   • Kruna lingga tigang wanda
     Upami : sagara, sepatu, padanda, sengkala, msl.
   • Kruna lingga petang wanda
     Upami : kalimayah, katibangbung, liligundi, msl.
   • Kruna lingga limang wanda
     Upami : katiwawalan, tambulilingan, katimumulan, msl.
2. Kruna Tiron
   Kruna Tiron inggih punika kruna lingga sane sampun polih wewehan makadi, pangater (awalan, seselan (sisipan), lan/utawi pangiring (akhiran). Sajeroning kruna tiron jagi kapanggihin wangun anusuara miwan sandi suara. Wangun kruna tiron :
   
   • Kruna lingga saha pangater upami : madaging, kaambil, subhakti, msl.
   • Kruna lingga saha pangiring upami : bantangin, matahan, rasanin, msl.
   • Krunalingga saha seselan upami : sinurat, telapak, gerigi, sumahur, msl.
   • Kruna lingga saha pengater miwah seselan
     upami : magerigi, magelebug, karumasa, kasinurat, msl.
   • Kruna lingga saha pangater miwah pangiring
     upami : kacagerang, masayuban, kapiangenan, msl.
   • Kruna lingga saha seselan miwah pangiring
     upami: sinarengan, kerosokan, kelentingan, msl.
   • Kruna lingga saha pangater, seselan, miwah pangiring
     upami : kasinauran, magerudugan, kakerepiakan, msl.
3. Kruna Dui Lingga (kata ulang)
   Pepalihannyane makadi :
   
   • Kruna dui samalingga (kata dasarnya sama) upami : alep-alep, putih-putih, ayu-ayu, msl.
   • Kruna dui samatra lingga (kata dasarnya tak sama) upami: kasa-kisi, rerad-rerod, krasak-krosok, msl.
   • Kruna dui maya lingga (kata dasarnya tak punya arti jika tak diulang) upami : omang-omang, kunang-kunang, katang-katang, biah-biah, msl.
   • Kruna dui purwa upami : sesajen, sesantun, sesari, kekawa, dedalu, dedari, msl.
   • Kruna dwi wesana upami : paketeltel, pakanyitnyit, pakaberber, msl.
4. Kruna Satma
   Kruna satma manut wangunnyane kabinayang :
   
   • Kruna satma sapadan (setara)
     
     1. Sane suksmannyane ngerasang arti
        upami : joh sawat, tegeh ngalik, gede gangsa, manis melenyat, pait makilit, msl.
     2. Sane suksmannyane nungkalik
        Upami : cerik kelih, tegeh endep, tua bajang, msl.
   • Kruna satma tan sapadan (tak setara)
     
     1. Wenten sane kasurat atep
        upami : matanai, jebogarum, suargaloka, msl.
     2. Wenten sane kasurat palas
        upami : biu batu, kacang lindung, uyah areng, msl.

Inggih amunika dumun. Sampun kenjel pesan tiang ngetik uli semengan. Tiang jagi manting dumun 'gih. Benjangan malih lanturang. Suksma!!(*bb/krb)